Search Tamilmeen

Home » Posts filed under sports

ராஸ் டெய்லருக்கு வாழ்வு கொடுத்த டெல்லி அணி

பெங்களூர், பிப். 14–
7–வது ஐ.பி.எல். போட்டிக்கான வீரர்கள் ஏலம் பெங்களூரில் 2 நாள் நடந்தது. மொத்தம் 154 வீரர்கள் ரூ.262.6 கோடிக்கு ஏலம் போனார்கள். 360 வீரர்கள் ஏலம் போகவில்லை.
நேற்று நடந்த 2–வது நாள் ஏலத்தில் உள்ளூர் வீரர்களுக்கு அதிர்ஷ்ட காற்று அடித்தது. கரண் ஷர்மா (ஐதராபாத்) ரூ.3ž கோடிக்கும், ரிஷி தவான் (பஞ்சாப்) ரூ.3 கோடிக்கும், கேதர் ஜாதவ் (டெல்லி) ரூ.2 கோடிக்கும், மனிஷ் பாண்டே (கொல்கத்தா) ரூ.1.70 கோடிக்கும் ஏலம் போனார்கள்.
முதல் நாள் ஏலத்தில் பல வீரர்கள் ஏலம் போகவில்லை. இதில் ராஸ் டெய்லர், ஜெயவர்த்தனே, டேவிட் ஹஸ்சி உள்பட முன்னணி சர்வதேச வீரர்கள் அடங்குவர்.
ஏலம் போகாத வீரர்கள் 2–வது நாளில் மறு ஏலம் விடப்பட்டனர். இதில் நியூசிலாந்து வீரர் ராஸ் டெய்லர் டெய்லருக்கு மட்டும் அதிர்ஷ்டம் இருந்தது. அவரை டெல்லி அணி அவரது அடிப்படை விலையான ரூ.2 கோடிக்கு ஏலம் எடுத்து அவருக்கு மறுவாழ்வு கொடுத்தது.
கட்நத சீசன்களில் ராஸ் டெய்லர் பெங்களூர், ராஜஸ்தான், டெல்லி ஆகிய அணிகளில் விளையாடி இருந்தார். 7–வது ஐ.பி.எல். வீரர்கள் ஏலம் முடிவில் ஒவ்வொரு அணியிலும் இடம் பெற்றுள்ள வீரர்கள் எண்ணிக்கை வருமாறு:–
சென்னை–20, பெங்களூர்–21, கொல்கத்தா–21, பஞ்சாப்–23, டெல்லி–23, ராஜஸ்தான்–25, மும்பை–21, ஐதராபாத்–24

source maalaimalar

20 ஓவர் உலககோப்பை மீது கவனம்: யுவராஜ் சிங்

ஐ.பி.எல். ஏலத்தில் யுவராஜ்சிங் அதிகபட்சமாக ரூ.14 கோடி ஏலம் எடுக்கப்பட்டார். அவரை பெங்களூர் அணி வாங்கியது.
இதுதொடர்பாக அவர் கூறும்போது:-
பெங்களூர் அணிக்காக விளையாட இருப்பது மிகவும் மகிழ்ச்சி அளிக்கிறது. எனது முழு திறமையை வெளிப்படுத்தக்கூடிய ஒரு இடத்திற்கு செல்வதாக உணர்கிறேன்.
கெய்ல், டிவில்லியர்ஸ் போன்ற சிறந்த வீரர்களுடன் இணைந்து விளையாடுவதை ஆவலுடன் எதிர்நோக்கி உள்ளேன். இருப்பினும் தற்போது எனது கவனம் 20 ஓவர் உலக கோப்பை போட்டி மீது தான் உள்ளது

source maalaimalar

ஜான்சன் சூறாவளி பந்துவீச்சுக்கு பணிந்தது தென்னாப்பிரிக்கா: வலுவான நிலையில் ஆஸ்திரேலியா

செஞ்சூரியன், பிப். 14-

தென்னாப்பிரிக்கா- ஆஸ்திரேலியா அணிகளுக்கு இடையேயான முதலாவது டெஸ்ட் போட்டி செஞ்சூரியனில் நடைபெற்று வருகிறது. ஆஸ்திரேலிய அணி முதல் இன்னிங்சில் 397 ரன்கள் குவித்தது. பின்னர் ஆடிய தென்னாப்பிரிக்கா இரண்டாம் நாள் ஆட்டநேர முடிவில் 6 விக்கெட் இழப்பிற்கு 140 ரன்கள் எடுத்திருந்தது. டிவில்லியர்ஸ் 52 ரன்களுடனும், பீட்டர்சன் 13 ரன்களுடனும் களத்தில் இருந்தனர்.

இன்று மூன்றாம் நாள் ஆட்டத்தை தொடங்கிய தென்னாப்பிரிக்க அணியின் பீட்டர்சன் மேற்கொண்டு ரன் ஏதும் சேர்க்காமல் ஆட்டமிழந்தார். பின்னர் களமிறங்கிய பிலாண்டர் 7 ரன்னில் ஆட்டமிழந்தார். சதமடிப்பார் என்று மிகவும் எதிர்பார்க்கப்பட்ட டிவில்லியர்ஸ் 91 ரன்களில் வெளியேறினார். கடைசி விக்கெட்டான மோர்கல் 18 ரன்னில் பெவிலியன் திரும்பினார். இதனால் தென்னாப்பிரிக்கா முதல் இன்னிங்சில் 206 ரன்னில் ஆல் அவுட்டானது.

ஆஸ்திரேலியா தரப்பில் மிரட்டலாக பந்து வீசிய மிட்செல் ஜான்சன் 68 ரன்கள் மட்டுமே விட்டுக்கொடுத்து 7 விக்கெட்டுகளை வீழ்த்தினார்.

இதையடுத்து 191 ரன்கள் முன்னிலையுடன் இரண்டாவது இன்னிங்சை தொடங்கிய ஆஸ்திரேலியாவின் தொடக்க ஆட்டக்காரர் ரோகர்ஸ் ஒரு ரன்னில் ஆட்டமிழந்தார். அதன்பின்னர் இணைந்த டேவிட் வார்னரும், அறிமுக வீரரான டூலானும் நிலைத்து நின்றதுடன், தென் ஆப்பிரிக்க பந்துவீச்சை விளாசித் தள்ளினர்.

அபாரமாக ஆடிய வார்னர் சதம் அடித்தார். 118 பந்துகளில் 13 பவுண்டரி, 2 சிக்சர்களுடன் இந்த இலக்கை அவர் எட்டினார். மறுமுனையில் ஆடிக்கொண்டிருந்த டூலானும் அரை சதம் கடந்து ஆடிக்கொண்டிருக்கிறார். இதனால் ஆஸ்திரேலிய அணி வலுவான முன்னிலையில் உள்ளது.

source maalaimalar

டெல்லி அணிக்கு கேப்டனாக விருப்பம்: பீட்டர்சன்

இங்கிலாந்து அணியில் இருந்து கழற்றிவிடப்பட்ட கெவின் பீட்டர்சனை டெல்லி டேர்டெவில்ஸ் அணி ரூ.9 கோடிக்கு ஏலம் எடுத்தது. அவர் அந்த அணியின் நட்சத்திர வீரராக உள்ளார். இந்த நிலையில் டெல்லி கேப்டனாக பீட்டர்சன் விருப்பம் தெரிவித்துள்ளார். அவர் கூறியதாவது:–
டெல்லி அணியில் முக்கிய பங்கு ஆற்ற விரும்புகிறேன். ஒரு கேப்டனாக இளம் வீரர்கள் அணிக்கு உதவும் ரோலாக இருக்க ஆசைப்படுகிறேன். நாங்கள் வலுவான அணியான இருக்கிறோம். ஒருங்கிணைந்து விளையாட வேண்டும். கேரி கிரிஸ்டன் பயிற்சியின் கீழ் விளையாட ஆர்வமாக உள்ளேன் என்றார்.

source maalaimalar

இந்திய நியூசிலாந்து அணிகளுக்கிடையேயான 2வது டெஸ்ட் போட்டி இன்று தொடங்கியது

வெலிங்டன், பிப்.14-

இந்திய நியூசிலாந்து அணிகளுக்கிடையேயான 2வது டெஸ்ட் போட்டி இன்று காலை தொடங்கியது. இப்போட்டியில் டாஸ் வென்ற இந்திய அணி தலைவர் டோனி நியூசிலாந்து அணியை பேட் செய்யுமாறு கேட்டுக்கொண்டார்.

கடந்த போட்டியில் விளையாடிய இந்திய அணி இப்போட்டியிலும் எவ்வித மாற்றமும் இன்றி பங்கேற்பதாக டோனி தெரிவித்துள்ளார். நியூசிலாந்து அணியில் ரோஸ் டெய்லர், ஐஷ் ஆகியோருக்கு பதிலாக ஜிம்மி நீஷம் மற்றும் டாம் லாதம் ஆகியோர் பங்கேற்பதாக அந்த அணியின் கேப்டன் மெக்கல்லம் தெரிவித்தார். இப்போட்டியில் நியூசிலாந்து அணி சுழற்பந்து வீச்சாளர்கள் இல்லாமலேயே களம் இறங்குகிறது.

தற்போது நியூசிலாந்து தனது முதல் இன்னிங்ஸை துவக்கி விளையாடி வருகிறது.

source maalaimalar

ஆஸ்திரேலியா - தென்னாப்பிரிக்கா இடையேயான முதலாவது டெஸ்ட் கிரிக்கெட் போட்டி: தென்னாப்பிரிக்கா திணறல்

செஞ்சூரியன், பிப்.13-

ஆஸ்திரேலியாவுக்கு எதிரான முதலாவது டெஸ்ட் போட்டியில் தென்னாப்பிரிக்காவில் உள்ள செஞ்சூரியன் நகரில் நடைபெற்றது. டாஸ் வென்ற ஆஸ்திரேலியா பேட்டிங்கை தேர்வு செய்தது. முதலாவது இன்னிங்சில் அந்த அணியின் ஷான் மார்ஷ் (148 ரன்), ஸ்மித்(100 ரன்) ஆகியோரின் அபார ஆட்டத்தால் 397 ரன்கள் குவித்தது ஆஸ்திரேலியா. தென்னாப்பிரிக்கா அணி தரப்பில் அபாரமாக பந்து வீசிய ஸ்டெய்ன் 4 விக்கெட்டுகளை வீழ்த்தினார். மெக்லாரன் மற்றும் பீட்டர்சன் தலா 2 விக்கெட்டுகளை வீழ்த்தினர்.

பின்னர் ஆட்டத்தை தொடங்கிய தென்னாப்பிரிக்க அணிக்கு ஆரம்பத்திலேயே அதிர்ச்சி காத்திருந்தது. கேப்டன் ஸ்மித் 10 ரன்னிலும், பீட்டர்சன் 2 ரன்னிலும், டூபிளசிஸ் 3 ரன்னிலும், அபாயகரமான ஆட்டக்காரரான ஆம்லா 17 ரன்னிலும் ஆட்டமிழந்தனர். 43 ரன்களுக்கு 4 விக்கெட்டுகளை இழந்த அந்த அணி 100 ரன்களை கடக்குமா என்ற சந்தேகம் எழுந்தது.

இந்நிலையில் அடுத்து களமிறங்கிய டிவில்லியர்சும் டுமினியும் அணியை சரிவிலிருந்து மீட்டு 100 ரன்களை கடக்க வைத்தனர். லயனின் பந்துவீச்சில் ஜான்சனின் சூப்பர் கேட்ச்சால் டுமினி ஆட்டமிழந்தார். இவரைத் தொடர்ந்து களமிறங்கிய மெக்லரன் 8 ரன்களில் ஆட்டமிழந்தார். இதற்கிடையில் டிவில்லியரிஸ் அரை சதத்தை கடந்தார்.

ஆட்டநேர முடிவில் தென்னாப்பிரிக்க அணி  6 விக்கெட் இழப்பிற்கு 140 ரன்கள் எடுத்துள்ளது. டிவில்லியரிஸ் 52 ரன்களுடனும் பீட்டர்சன் 13 ரன்களுடனும் களத்தில் உள்ளனர். 4 விக்கெட்டுகள் கைவசம் உள்ள நிலையில் தென்னாப்பிரிக்க அணி 257 ரன்கள் பின்தங்கியுள்ளது குறிப்பிடத்தக்கது. ஆஸ்திரேலியா தரப்பில் ஜான்சன் 4 விக்கெட்டுகளை வீழ்த்தினார்.

source maalaimalar

யுவராஜ்சிங்குக்கு கூடுதலாக ரூ.4 கோடி: கொல்கத்தா அணி மீது விஜய்மல்லையா புகார்

ஐ.பி.எல். ஏலத்தில் அதிக விலைக்கு போனவர் யுவராஜ்சிங். யாரும் எதிர் பார்க்காத வகையில் பெங்களூர் ராயல்ஸ் சேலஞ்சர்ஸ் அணி அவரை ரூ.14 கோடிக்கு எடுத்தது. அவரை எடுக்க பெங்களூர், கொல்கத்தா நைட் ரைடர்ஸ் அணிகள் இடையே கடும் போட்டி ஏற்பட்டது. 

யுவராஜ்சிங்குக்கு ரூ.4 கோடி கூடுதலாக போனது துரதிருஷ்டவசமானது என்று பெங்களூர் அணியின் உரிமையாளர் விஜய் மல்லையா கூறியுள்ளார். இது தொடர்பாக கொல்கத்தா அணி மீது அவர் ஐ.பி.எல். கவுன்சிலில் புகார் அளித்து இருக்கிறார். யுவராஜ்சிங்கை ரூ.10 கோடிக்கு எடுத்து முடிந்த பிறகு தான் கடைசி நேரத்தில் கொல்கத்தா அணி மீண்டும் விலையை ஏற்றிவிட்டதாக அவர் குற்றம் சாட்டியுள்ளார்.

source maalaimalar

7-வது ஐ.பி.எல். கிரிக்கெட் தொடர் ஏப்ரல் 9 முதல் ஜுன் 3 வரை நடக்கிறது

பெங்களூர், பிப். 13-

ஐ.பி.எல். கிரிக்கெட் போட்டி ஒவ்வொரு வருடமும் ஏப்ரல் மாதம் தொடங்கி மே அல்லது ஜுன் முதல் வாரம் முடிவடையும். இந்த வருடம் ஐ.பி.எல். சீசன்-7 நடைபெறுகிறது.

இந்திய பாராளுமன்றத்திற்கு வருகின்ற ஏப்ரல் அல்லது மே மாதம் தேர்தல் நடைபெற இருக்கிறது. இதனால் பாதுகாப்பு கருதி ஐ.பி.எல். போட்டி தள்ளிப்போகலாம் அல்லது தேர்தலுக்கு முன்னரே நடத்தப்படலாம் என்று கூறப்பட்டது. ஆனால், கடந்த சில நாட்களுக்கு முன் ஐ.பி.எல். நிர்வாகம், ஐ.பி.எல். சீசன்-7 குறிப்பிட்ட நேரத்தில் நடைபெறும் என்றும் தேர்தலுக்காக தேதி மாற்றப்படாது என்றும் கூறியது. ஆனால், இந்தியாவை வெளியில் நடத்தப்படும் என்றும் தெரிவித்திருந்தது.

இந்நிலையில் ஐ.பி.எல். வீரர்கள் ஏலம் நேற்று தொடங்கி இன்று வரை நடைபெற்றது. அதன்பின் ஐ.பி.எல். சேர்மன் பிஸ்வால் கூறியதாவது:-

ஐ.பி.எல். சீசன்-7 போட்டிக் குறித்து கடந்த இரண்டு நாட்களாக ஆலோசனை நடத்தினோம். இறுதியில் ஏப்ரல் 9-ந் தேதி தொடங்கி ஜுன் 3-ந்தேதி வரை நடத்துவது என்று முடிவு செய்துள்ளோம். போட்டியை இந்தியாவில் நடத்துவதா அல்லது தென் ஆப்பிரிக்காவில் நடத்துவதா என்பது குறித்து மத்திய பாதுகாப்பு அமைச்சகத்திடம் பேசிய பின் அறிவிப்போம்.

நாங்கள் பெரும்பாலான போட்டிகளை இந்தியாவில் நடத்த விரும்புகிறோம். பாதுகாப்பு அமைச்சகத்தின் பதில் எங்களுக்கு சாதகமாக இருந்தால் அனைத்து போட்டிகளையும் இந்தியாவில் நடத்துவோம். பாதுகாப்பு அமைச்சர் இந்தியாவில் நடத்த சம்மதம் தெரிவிக்கவில்லையென்றால் எங்களது அடுத்த திட்டம் தென் ஆப்பிரிக்காதான்.

மேலும் இரண்டு இடங்களை தேர்வு செய்துள்ளோம். அதை இப்போது தெரிவிக்க இயலாது. மத்திய அமைச்சகத்தின் பதிலுக்குப்பின் போட்டிக்கான இடம், அட்டவணை அறிவிக்கப்படும்.

இவ்வாறு அவர் கூறினார்.

இதற்கு முன் 2009-ம் ஆண்டு இந்திய தேர்தல் நடந்தபோது, ஐ.பி.எல். சீசன்-2 தென் ஆப்பிரிக்காவில் நடைபெற்றது குறிப்பிடத்தக்கது.

source maalaimalar

கோமா நிலையில் உள்ள ஷுமாக்கருக்கு நுரையீரல் தொற்று

கிரெநோபில், பிப். 12-

உலகப் புகழ் பெற்ற பார்முலா-1 கார் பந்தய வீரரான மைக்கேல் ஷுமாக்கர்(45) ஜெர்மனி நாட்டைச் சேர்ந்தவர். இவர் தனது 19 வருட கார் பந்தய வாழ்க்கையில் ஏழு முறை உலகக் கோப்பையை வென்றுள்ளார். கடந்த 2012ஆம் ஆண்டில்தான் இவர் தொழில்முறைப் போட்டிகளில் இருந்து ஓய்வு பெற்றார்.

கடந்த ஆண்டு டிசம்பர் மாத விடுமுறையைக் கழிக்க ஷுமாக்கர் தனது குடும்பத்தினருடன் பிரான்ஸ் தேசத்தின் ஆல்ப்ஸ் மலை அடிவாரத்திற்கு சென்றிருந்தார். அங்கு அந்த மாதம் 29ஆம் தேதி தனது மகனுடன் பனிச்சறுக்கு விளையாட்டில் ஈடுபட்டிருந்த அவர் திடீரென்று சறுக்கியதில் பாறை மீது மோதி தலையில் பலத்த காயமடைந்தார்.

உடனடியாக கிரெநோபில் மருத்துவமனைக்குக் கொண்டுவரப்பட்ட அவருக்கு தலையில் இரண்டு அறுவை சிகிச்சைகள் செய்யப்பட்டன. அதன்பின்னர் அவரது மூளையில் ஏற்பட்டுள்ள அழுத்தத்தினைக் குறைக்கவேண்டி மருத்துவர்கள் அவரை மருத்துவ கோமா நிலையில் வைத்தனர். இரண்டு வாரங்களுக்கு முன்னால் அவர் விழிப்பதற்காக மாத்திரைகளின் அளவைக் குறைக்க இருப்பதாகத் தெரிவித்திருந்த மருத்துவர்கள் அவர் கண் விழித்த பின்னரே அவருக்கு ஏற்பட்டுள்ள குறைபாடுகள் தெரியவரும் என்று குறிப்பிட்டனர்.

இந்த நிலையில் அவருக்கு நுரையீரல் தொற்று ஏற்பட்டுள்ளதாக ஜெர்மன் பத்திரிகை ஒன்று இன்று செய்தி வெளியிட்டுள்ளது. நலிந்த நிலையில் உள்ள அவரது சுகாதார நிலைமைகள் குறித்து தெளிவாகத் தெரியவில்லை என்று அந்தப் பத்திரிகை குறிப்பிட்டிருந்தது. இந்த யூகங்கள் குறித்து கருத்து எதுவும் வெளியிடப்படுவதற்கு இல்லை என்று ஷுமாக்கரின் செய்தித் தொடர்பாளர் சபைன் கெம் பத்திரிகையாளர்களிடம் தெரிவித்துள்ளார்.

ஷுமாக்கரின் உடல்நிலை குறித்து சிறிதளவு தகவல்களே வெளியிடப்படும் நிலையில் பல வதந்திகள் வெளிவருகின்றன. கடந்த வியாழக்கிழமை அன்று சமூக இணையதளங்களில், அவர் இறந்துவிட்டதாகப் பரபரப்பாகப் பரவிய செய்திகளை மருத்துவமனை மறுத்துள்ளது.

source maalaimalar

ஐ.பி.எல். வீரர்கள் ஏலம்: ரூ.51 கோடி செலவு செய்த டெல்லி அணி

பெங்களூர், பிப். 12-

ஐ.பி.எல். 20 ஓவர் கிரிக்கெட் போட்டிக்கான வீரர்கள் ஏலம் பெங்களூரில் உள்ள நட்சத்திர ஓட்டலில் இன்று காலை 9.30 மணிக்கு தொடங்கியது. ஐ.பி.எல் ஏலப்பட்டியலில் 219 சர்வதேச வீரர்கள் உள்பட 514 பேர் இடம் பெற்று இருந்தனர்.

முதல் முறையாக இந்திய ரூபாய் மதிப்பில் ஏலம் நடத்தப்பட்டது. ரிச்சர்டு மேட்லி ஏலத்தை நடத்தினார். இன்று 219 வீரர்கள் ஏலம் விடப்பட்டனர். இதில் 149 வீரர்கள் விலைபோகவில்லை. அதிகபட்சமாக யுவராஜ் சிங் ரூ.14 கோடிக்கு ஏலம் போனார். அவரை பெங்களூர் ராயல் சேலஞ்சர்ஸ் அணி எடுத்தது.

அடுத்தப்படியாக தினேஷ் கார்த்தி ரூ. 12.5 கோடிக்கு போனார். அவரை டெல்லி டேர்டெவில்ஸ் அணி எடுத்தது. குறைந்த விலையான ரூ.30 லட்சத்திற்கு பிராண்டன் டெய்லர் (சன் ரைசர்ஸ்), சாமுவேல் (சென்னை சூப்பர் கிங்ஸ்), மேட் ஹென்றி (சென்னை சூப்பர் கிங்ஸ்) ஆகியோர் ஏலம் போனார்கள்.

சென்னை சூப்பர் கிங்ஸ் இன்றைய ஏலத்திற்காக ரூ. 18 கோடியே 10 லட்சம் செலவு செய்துள்ளது. இந்த அணி 8 வீரர்களை ஏலம் எடுத்துள்ளது. இதில் மோகித் சர்மா மட்டுமே இந்தியாவைச் சேர்ந்தவர். 

டெல்லி டேர்டெவில்ஸ் ரூ. 51 கோடியே 40 லட்சம் செலவு செய்து, 13 வீரர்களை ஏலம் எடுத்துள்ளது. இதில் 8 இந்திய வீரர்கள். 5 பேர் வெளிநாட்டு வீரர்கள்.

கிங்க்ஸ் லெவன் பஞ்சாப் ரூ. 29 கோடியே 30 லட்சம் செலவு செய்து, 5 இந்திய வீரர்கள் உள்பட மொத்தம் 10 வீரர்களை பெற்றுள்ளது. அதிகபட்சமாக மிட்செல் ஜான்சனை ரூ. 6.5 கோடிக்கு எடுத்துள்ளது.

கொல்கத்தா நைட் ரைடர்ஸ் ரூ. 29 கோடி செலவு செய்து 5 இந்திய வீரர்கள் உள்ளிட்ட 8 வீரர்களை ஏலம் எடுத்துள்ளது. காலிசை அதிகபட்சமாக ரூ. 5.5 கோடிக்கு எடுத்துள்ளது.

மும்பை இந்தியன்ஸ் ரூ. 15 கோடியே 80 லட்சம் செலவு செய்துள்ளது. இந்த அணி 5 வீரர்களை ஏலம் எடுத்துள்ளது. இதில் 2 பேர் இந்தியாவைச் சேர்ந்தவர்கள். அதிகபட்சமாக ரூ.5 கோடி கொடுத்து மைக் ஹசேவை எடுத்துள்ளது.

ராஜஸ்தான் ராயல்ஸ் ரூ. 9 கோடியே 4 லட்சம் செலவு செய்துள்ளது. ஸ்டீவன் ஸ்மித்தை அதிகபட்சமாக 4 கோடிக்கு எடுத்துள்ளது. இந்த அணி 6 வீரர்களை இன்று தேர்வு செய்ததில் அபிஷேக் நாயர் மட்டும் இந்தியாவைச் சேர்ந்தவர்.

ராஜஸ்தான் ராயல்ஸ் ரூ. 28 கோடியே 70 லட்சம் செலவு செய்து 9 வீரர்களை ஏலம் எடுத்துள்ளது. அதிகபட்சமாக யுவராஜ் சிங்கை ரூ. 14 கோடி கொடுத்து எடுத்துள்ளது. இதில் 4 பேர் இந்திய வீரர்கள் ஆவர்.

ஐதராபாத் சன் ரைசர்ஸ் ரூ. 29 கோடியே 60 லட்சம் செலவு செய்து 5 இந்திய வீரர்கள் உள்ளிட்ட 11 வீரர்களை ஏலம் எடுத்துள்ளது.

source maalaimalar

ஐ.பி.எல். ஏலத்தில் ஒவ்வொரு அணியிலும் நீட்டிக்கப்பட்ட வீரர்கள்

ஐ.பி.எல். ஏலத்திற்கு முன்பு அணிகள் தங்கள் வீரர்களை தக்க வைத்துக் கொண்டது. டெல்லி அணி மட்டும் யாரையும் தக்க வைக்கவில்லை. மொத்தம் 24 வீரர்கள் தக்க வைக்கப்பட்டு உள்ளனர். அதன் விவரம்:–
சென்னை (5):– டோனி, ரெய்னா, ரவிந்திர ஜடேஜா, அஸ்வின், வெய்ன் பிராவோ (வெஸ்ட்இண்டீஸ்).
மும்பை (5):– ரோகித் சர்மா, ஹர்பஜன்சிங், அம்பதி ராயுடு, போலார்ட் (வெஸ்ட்இண்டீஸ்), மலிங்கா (இலங்கை).
ராஜஸ்தான் (5):– ரகானே, ஸ்டூவர்ட் பின்னி, சஞ்சு சாம்சன், வாட்சன், பல்க்னெர் (ஆஸ்திரேலியா).
பெங்களூர் (3):– வீராட் கோலி, கிறிஸ் கெய்ல் (வெஸ்ட்இண்டீஸ்), டிவில்லி யர்ஸ் (தென்ஆப்பிரிக்கா).
பஞ்சாப் (2):– டேவிட் மில்லர் (ஆஸ்திரேலியா), மனை வோரா.
கொல்கத்தா (2): காம்பீர், சுனில் நரீன்.
ஐதராபாத் (2): ஷிகார் தவான், ஸ்டெய்ன் (தென் ஆப்பிரிக்கா).

source maalaimalar

ஐ.பி.எல். சூதாட்டம்: டோனி-ரெய்னாவின் தொடர்பை அம்பலமாக்கிய சென்னை புரோக்கர்கள்

சென்னை, பிப். 12–
ஐ.பி.எல். கிரிக்கெட் சூதாட்ட விவகாரம் கடந்த ஆண்டு மே மாதம் பெரும் பரபரப்பை ஏற்படுத்தியது. இது தொடர்பாக டெல்லியில் சூதாட்ட தரகர்கள் பலர் கைது செய்யப்பட்டனர். இந்தி நடிகர் விண்டு தாராசிங், சென்னை சூப்பர் கிங்ஸ் அணியின் கவுரவ உறுப்பினரான குருநாத் மெய்யப்பன் ஆகியோருக்கும் இதில் தொடர்பு இருப்பதாக தகவல்கள் வெளியானது.
இதற்கிடையே ஐ.பி.எல். கிரிக்கெட் சூதாட்டம் தொடர்பாக விசாரணை நடத்திய நீதிபதி முகுல் முட்கல், அசாம் கிரிக்கெட் சங்க நிர்வாகி வக்கீல் நிவேதத்தா உள்ளிட்டோர் அடங்கிய குழுவினர் சுப்ரீம் கோர்ட்டில் 170 பக்க அறிக்கையை தாக்கல் செய்தனர். அதில் திடுக்கிடும் தகவல்கள் இடம் பெற்றுள்ளன. குருநாத் மெய்யப்பனுக்கு ஐ.பி.எல். சூதாட்டத்தில் தொடர்பு இருப்பதாகவும், இந்திய கிரிக்கெட் வீரர்கள் 6 பேருக்கு சூதாட்டத்தில் தொடர்பு இருப்பதாகவும் அந்த அறிக்கையில் குறிப்பிடப்பட்டுள்ளது.
இதற்கிடையே ஐ.பி.எல். சூதாட்டம் தொடர்பாக சென்னையில் பிடிபட்ட உத்தம் ஜெயின் என்ற சிட்டி, பல்வேறு தகவல்களை கூறியிருக்கிறார். ஆனால் இவையெல்லாம் அப்போது அம்பலத்துக்கு வரவில்லை. சி.பி.சி.ஐ.டி. போலீசார், இந்த தகவல்களையெல்லாம் மூடி மறைத்து விட்டனர். அப்போது கியூ பிரிவு போலீஸ் சூப்பிரண்டாக பணிபுரிந்த சம்பத் குமார் தான் (தற்போது திருச்சி ரெயில்வே சூப்பிரண்டு) சூதாட்ட புரோக்கரிடம் முதலில் விசாரணை நடத்தினார். அப்போது கிரிக்கெட் வீரர்கள் டோனி, சுரேஷ் ரெய்னா உள்ளிட்டோருக்கும் சூதாட்டத்தில் தொடர்பு இருப்பதாக உத்தம் ஜெயின் கூறியிருக்கிறார். இந்த விவகாரங்கள் எல்லாம் சுப்ரீம் கோர்ட்டில் சூதாட்டம் தொடர்பான அறிக்கை தாக்கல் செய்யப்பட்ட பின்னரே வெளியாகி யிருக்கிறது.
சென்னையில் பிடிபட்ட புரோக்கரான உத்தம் ஜெயின், கூறிய தகவல்கள் எல்லாம், 10 மாதங்களுக்கு பின்னர் இப்போதுதான் வெளிச்சத்துக்கு வந்துள்ளது.
ஐ.பி.எல். சூதாட்டம் தொடர்பாக, உத்தம் ஜெயின், ஏராளமான தகவல்களை கூறியுள்ளார். அந்த விஷயங்களை தெரிந்து வைத்திருந்த போலீஸ் அதிகாரிகள் இடம் மாற்றம் செய்யப்பட்டுள்ளனர். பின்னர் இந்த வழக்கு சி.பி.சி.ஐ.டிக்கு மாற்றப்பட்டது. இது தொடர்பான விசாரணை அறிக்கையை கேட்ட போது யாரும் தாக்கல் செய்யவில்லை என்றும் அந்த அறிக்கையில் குற்றம் சாட்டப்பட்டுள்ளது. சென்னை புரோக்கர்கள் கைதான போது, இங்குள்ளவர்களுக்கும், டெல்லியில் பிடிபட்டவர்களுக்கும் தொடர்பு இல்லை என சி.பி.சி.ஐ.டி போலீசார் கூறிய நிலையில் சுப்ரீம் கோர்ட்டில் தாக்கல் செய்யப்பட்டுள்ள அறிக்கை மூலமாக சென்னை புரோக்கர்களின் சர்வதேச சூதாட்ட தொடர்பு அம்பலமாகியிருக்கிறது. இது சி.பி.சி.சி.ஐ.டி போலீசாரை சிக்கலில் ஆழ்த்தியுள்ளது.

source maalaimalar

ஐ.பி.எல். ஏலம்: யுவராஜ் சிங் ரூ.14 கோடிக்கு ஏலம் போனார்

பெங்களூர், பிப். 12–

7–வது ஐ.பி.எல். 20 ஓவர் கிரிக்கெட் போட்டிக்கான வீரர்கள் ஏலம் பெங்களூரில் உள்ள நட்சத்திர ஓட்டலில் இன்று காலை 9.30 மணிக்கு தொடங்கியது. ஐ.பி.எல் ஏலப்பட்டியலில் 219 சர்வதேச வீரர்கள் உள்பட 514 பேர் இடம் பெற்று இருந்தனர். 

இந்தியர்களில் 169 சர்வதேச வீரர்களும், முதல் தரபோட்டியில் விளையாடிய 255 பேரும் அடங்குவார்கள். மீதியுள்ளவர்கள் வெளிநாட்டு வீரர்கள் ஆவார்கள். முதல் முறையாக இந்திய ரூபாய் மதிப்பில் ஏலம் நடத்தப்பட்டது. ரிச்சர்டு மேட்லி இதை நடத்தினார். முதலில் தமிழகத்தை சேர்ந்த முரளி விஜய் ஏலம் விடப்பட்டார். அவருக்கான அடிப்படை விலை ரூ.2 கோடியாகும். 

டெல்லி டேர்டெவில்ஸ் அணியும், சன்ரைசர்ஸ் ஐதராபாத் அணியும் அவரை எடுக்க போட்டியிட்டன. இறுதியில் டெல்லி அணி ரூ.5 கோடிக்கு எடுத்தது. கடந்த 6 ஐ.பி.எல். போட்டியிலும் அவர் சென்னை சூப்பர் கிங்ஸ் அணியில் விளையாடினார். அந்த அணி நிர்வாகம் அவரை தக்க வைத்துக்கொள்ள மேட்ச் கார்டை பயன்படுத்த வில்லை. அடுத்து இலங்கை முன்னாள் கேப்டன் ஜெயவர்த்தனே இடம் பெற்று இருந்தார். அவரை எந்த அணியும் வாங்கவில்லை. 

இங்கிலாந்தை சேர்ந்த நட்சத்திர வீரர் பீட்டர்சன் ஏலத்துக்கு விடப்பட்டார். அவரை எடுக்க கடும் போட்டி இருந்தது. டெல்லி அணி ‘மேட்ச்’ கார்டை பயன்படுத்தி அவரை ரூ.9 கோடிக்கு எடுத்தது. 20 ஓவர் போட்டி நாயகனாக யுவராஜ்சிங் அதிக தொகையான ரூ.14 கோடிக்கு ஏலம் போனார். அவரை ராயல் சேலஞ்சர்ஸ் பெங்களூர் அணி எடுத்தது. நிர்ணயிக்கப்பட்டதை விட (2 கோடி) அவர் 7 மடங்கு விலைக்கு போனார். 

கொல்கத்தா அணிக்கும், பெங்களூர் அணிக்கும் யுவராஜ் சிங்கை எடுக்க கடும் போட்டி இருந்தது. இதனால் தான் அவரது விலையும் உயர்ந்தது. இறுதியில் பெங்களூர் அணி எடுத்தது. தென்ஆப்பிரிக்கா வீரர் காலிசை ரூ.5 ½ கோடிக்கு கொல்கத்தா நைட் ரைடர்ஸ் எடுத்தது. 

சென்னை அணியிடம் இருந்து மேட்ச் கார்டை பயன்படுத்தி கொல்கத்தா அணி அவரை வாங்கியது. அதிரடி பேட்ஸ்மேனாக திகழ்ந்த ஷேவாக் ரூ.3.2 கோடிக்குத் தான் விலை போனார். கிங்ஸ் லெவன் பஞ்சாப் அணி அவரை எடுத்தது. டெல்லி அணி அவரை ஏலத்தில் எடுத்து தக்க வைத்துக்கொள்ள விரும்பவில்லை. 

அடுத்து ஆஸ்திரேலிய தொடக்க வீரர் டேவிட் வார்னரை ஐதராபாத் அணி ரூ.5½ கோடிக்கு எடுத்தது. தமிழக வீரர் தினேஷ் கார்த்திக்குக்கு அதிக மவுசு இருந்தது. அவரை ரூ.12½ கோடிக்கு டெல்லி அணி எடுத்தது. அவருக்கு நிர்ணயிக்கப்பட்ட தொகையை விட 6 மடங்குக்கு அதிகமாக விலை போனார். டூபெலிசிசை சென்னை சூப்பர் கிங்ஸ் அணி ரூ4.75 கோடிக்கு தக்க வைத்தது.

source maalaimalar

ஐ.பி.எல். ஏலம் இன்று தொடங்குகிறது: பீட்டர்சனை எடுக்க கடும் போட்டி

பெங்களூர், பிப்.12- 

ஐ.பி.எல். கிரிக்கெட் போட்டிக்கான ஏலம் பெங்களூரில் இன்று தொடங்குகிறது. ஒரு பக்கம் சூதாட்ட சர்ச்சை பற்றி எரிகின்ற நிலையில், மறுபுறம் மிகுந்த எதிர்பார்ப்புக்கு மத்தியில், 7-வது ஐ.பி.எல். 20 ஓவர் கிரிக்கெட் போட்டிக்கான வீரர்களின் ஏலம் பெங்களூரில் உள்ள நட்சத்திர ஓட்டலில் இன்றும், நாளையும் நடக்கிறது. 8 அணிகளின் உரிமையாளர்கள், நிர்வாகிகள் ஏலத்தில் கலந்து கொள்கிறார்கள். 

ஏலப்பட்டியலில் மொத்தம் 514 வீரர்கள் இடம் பெற்றுள்ளனர். இதில் 169 இந்தியர் உள்பட 219 பேர் சர்வதேச கிரிக்கெட்டில் விளையாடிய அனுபவம் உள்ளவர்கள். 255 இந்தியர் உள்பட 295 பேர் உள்ளூர் மற்றும் முதல்தர கிரிக்கெட்டில் ஆடியவர்கள். சர்வதேச போட்டிகளில் ஆடாத வீரர்களும் ஏலத்திற்கு வருவது இதுவே முதல் முறையாகும். அத்துடன் வீரர்கள் ஏலத்தொகை முதல்முறையாக இந்திய ரூபாய் மதிப்பில் (முன்பு அமெரிக்க டாலர்) கணக்கிடப்படுகிறது. 

*ஒவ்வொரு அணியும் குறைந்தது ரூ.36 கோடியில் இருந்து அதிகபட்சமாக ரூ.60 கோடி வரை வீரர்களை ஏலத்தில் வாங்க செலவு செய்யலாம். 

*ஒவ்வொரு அணியிலும் குறைந்தது 16 வீரர்களும், 27 பேருக்கு மிகாமலும் இருக்க வேண்டும். இதில் அதிகபட்சமாக 9 வெளிநாட்டு வீரர்கள் இடம் பெறலாம். 

*சென்னை சூப்பர் கிங்ஸ் அணி கேப்டன் டோனி, சுரேஷ் ரெய்னா, ரவீந்திர ஜடேஜா, அஸ்வின், வெய்ன் பிராவோ ஆகிய 5 வீரர்களை தக்க வைத்துக் கொண்டிருப்பதால் அவர்களுக்குரிய ஊதியத் தொகை ரூ.39 கோடி (ரூ.12.5 கோடி, 9.5 கோடி, ரூ.7.5 கோடி, ரூ.5.5 கோடி, ரூ.4 கோடி) போக மீதமுள்ள 21 கோடியை கொண்டு தான் எஞ்சிய வீரர்களை வாங்க முடியும். இதே போல் 5 வீரர்களை முழுமையாக தக்க வைத்துக் கொண்ட ராஜஸ்தான் ராயல்ஸ் அணியின் நிலைமையும் இது தான். 

*எந்த வீரர்களையும் வைத்துக் கொள்ளாத டெல்லி டேர்டெவில்ஸ் அணி மட்டுமே முழுமையான இருப்புடன் (ரூ.60 கோடி) ஏலத்தில் குதிக்கிறது. *இந்த முறை ‘மேட்ச் கார்டு’ என்ற புதிய முறை அறிமுகமாகிறது. அதாவது தங்கள் அணியில் இருந்து விடுவித்த ஒரு வீரரை மறுபடியும் தங்கள் அணிக்கு இழுக்க விரும்பினால், மேட்ச் கார்டு சலுகையை பயன்படுத்தி அந்த வீரரை ஏலத்தில் கேட்கப்பட்ட அதிகபட்ச தொகையை கொடுத்து வாங்கிக் கொள்ள முடியும். தக்க வைத்துக் கொள்ளப்படும் வீரர்களின்அடிப்படையிலேயே மேட்ச் கார்டு எண்ணிக்கை அமையும். 

சென்னை அணிக்கு ஒரு மேட்ச் கார்டு வழங்கப்பட்டுள்ளது. டெல்லி அணிக்கு 3 மேட்ச் கார்டு கிடைத்துள்ளது. பஞ்சாப், கொல்கத்தா, ஐதராபாத் அணிகள் தலா 2 மேட்ச் கார்டு வைத்துள்ளன. ஏலத்தில், முத்திரை அந்தஸ்து பெற்ற வீரர்கள் கணிசமான தொகைக்கு விற்கப்படுவார்கள் என்று கணிக்கப்பட்டுள்ளது. டெல்லி அணி ஷேவாக்கை தக்க வைத்துக் கொள்ளாவிட்டாலும், அவரை ஏலம் மூலம் மீண்டும் எடுக்க வாய்ப்புள்ளது. 

இதே போல் யுவராஜ்சிங்கை வாங்கவும் போட்டி இருக்கும். யுவராஜ்சிங்கை தங்கள் அணிக்கு எடுக்க பெங்களூர் ராயல் சேலஞ்சர்ஸ் கேப்டன் விராட்கோலி விரும்புகிறார். இவர்களது அடிப்படை விலை ரூ.2 கோடியாகும். வெளிநாட்டு வீரர்களில் இரண்டு வீரர்களை தான் பெரும்பாலான அணிகள் குறி வைத்துள்ளன. 

அதிரடிக்கு பிரசித்தி பெற்ற இங்கிலாந்து நட்சத்திர பேட்ஸ்மேன் கெவின் பீட்டர்சனை, இங்கிலாந்து கிரிக்கெட் வாரியம் திடீரென நிரந்தரமாக நீக்கி விட்டது. இனி சர்வதேச போட்டியில் அவர் விளையாட வாய்ப்பில்லை என்பதால், முதல்முறையாக இந்த ஐ.பி.எல். சீசனில் முழுமையாக அவர் விளையாட முடியும். இதனால் அவரை இழுக்க ஒவ்வொரு அணிகளும் வரிந்துகட்டும்.

கிங்ஸ் லெவன் அணி அவரை இழுப்பதற்கான வியூகங்களை தீட்டி வருகிறது. இவரது அடிப்படை விலை ரூ.2 கோடியாகும். நியூசிலாந்து ஆல்-ரவுண்டர் கோரி ஆண்டர்சனுக்கும் கிராக்கி காணப்படுகிறது. ஒரு நாள் போட்டியில் 36 பந்துகளில் சதம் அடித்து உலக சாதனை படைத்தவரான இவரது அடிப்படை விலை ரூ.1 கோடி என்றாலும், அதை விட சில மடங்கு தாராளமாக உயரும் என்பதில் சந்தேகமில்லை. 

மஹேலா ஜெயவர்த்தனே, தில்ஷன், மேத்யூஸ் (இலங்கை), டேவிட் வார்னர், மிட்செல் ஜான்சன், கிளைன் மேக்வெல், ஸ்டீவன் சுமித், மைக் ஹஸ்சி (ஆஸ்திரேலியா), பிரன்டன் மெக்கல்லம் (நியூசிலாந்து), காலிஸ் (தென்ஆப்பிரிக்கா), வெய்ன் சுமித், டேரன் சேமி (வெஸ்ட் இண்டீஸ்), அலெக்ஸ் ஹாலஸ் (இங்கிலாந்து), உத்தப்பா, முரளிவிஜய், யூசுப் பதான், தினேஷ் கார்த்திக், ஜாகீர்கான், எல்.பாலாஜி (இந்தியா), கெவின் ஓ பிரையன் (அயர்லாந்து) உள்ளிட்டோரும் நல்ல தொகைக்கு விலை போகலாம். 

வீரர்கள் மொத்தம் 53 பிரிவாக பிரிக்கப்பட்டு ஏலம் விடப்படுகிறார்கள். இதில் ஷேவாக், யுவராஜ்சிங், பீட்டர்சன் உள்ளிட்டோர் முதல் பிரிவில் அங்கம் வகிப்பதால், அவர்கள் தொடக்கத்திலேயே ஏலத்திற்கு வருகிறார்கள். காலை 9.30 மணிக்கு தொடங்கும் ஏலம் நிகழ்ச்சியை சோனி சிக்ஸ் சேனல் நேரடி ஒளிபரப்பு செய்கிறது.

source maalaimalar

சென்னை-ராஜஸ்தான் ஆட்டத்தில் சந்தேகம்: ஐ.பி.எல். சூதாட்டத்தில் டோனி, ரெய்னாவுக்கு தொடர்பு?

புதுடெல்லி, பிப்.12- 

ஐ.பி.எல். சூதாட்டத்தில் டோனி, ரெய்னாவுக்கும் தொடர்பு இருப்பதாக திடுக்கிடும் தகவல்கள் வெளியாகியுள்ளன. 

ஐ.பி.எல். கிரிக்கெட் சூதாட்டம் தொடர்பாக விசாரித்த நீதிபதி முகுல் முட்கல், கூடுதல் சொலிசிடர் ஜெனரல் என்.நாகேஸ்வர்ராவ், அசாம் கிரிக்கெட் சங்க நிர்வாகி வக்கீல் நிலே தத்தா ஆகியோர் கொண்ட கமிட்டி, சுப்ரீம் கோர்ட்டில் நேற்று முன்தினம் 170 பக்க அறிக்கையை தாக்கல் செய்தது. அறிக்கையில் பல திடுக்கிடும் தகவல்கள் இடம் பெற்றுள்ளன. சூதாட்டத்தில் இந்திய அணிக்காக விளையாடிய 6 வீரர்களுக்கு தொடர்பு இருப்பதாக கூறப்பட்டுள்ளது. 

ஆனால் முட்கல், தனது அறிக்கையில் எந்த தேசிய வீரரின் பெயரையும் குறிப்பிடவில்லை என்று தெளிவுப்படுத்தியிருக்கிறார். நிலே தத்தா தான் தனது அறிக்கையில் 6 இந்திய வீரர்களுக்கு தொடர்பு உண்டு என்பதை கூறியிருக்கிறார். அது பற்றிய விவரம் வருமாறு:- சென்னை சூப்பர் கிங்ஸ் அணியின் கேப்டன் டோனி, சுரேஷ் ரெய்னா ஆகியோருக்கும் ‘மேட்ச் பிக்சிங்’ மற்றும் சூதாட்டத்தில் தொடர்பு உண்டு என்று கைது செய்யப்பட்ட சூதாட்ட புரோக்கர் உத்தம் ஜெயின் என்ற கிட்டி, திருச்சி ரெயில்வே போலீஸ் சூப்பிரண்டு ஜி.சம்பத்குமார் நடத்திய விசாரணையின் போது கூறியதாக அந்த போலீஸ் அதிகாரி எங்களிடம் தெரிவித்தார். 

விக்ரம் அகர்வால் (ஓட்டல் அதிபர்), குருநாத் மெய்யப்பன் (சென்னை சூப்பர்கிங்ஸ் அணியின் கவுரவ உறுப்பினர்), கிரிக்கெட் வீரர்கள் டோனி, சுரேஷ் ரெய்னா மற்றும் இன்னும் சிலருக்கு மேட்ச் பிக்சிங்கில் என்னென்ன தொடர்பு உண்டு என்பதை தனக்கு தெரிந்த எல்லாவற்றையும் உத்தம் ஜெயின் சொல்லியிருக்கிறார். 

கடந்த மே 12-ந்தேதி ஜெய்ப்பூரில் நடந்த சென்னை சூப்பர்கிங்ஸ்- ராஜஸ்தான் ராயல்ஸ் அணிகள் இடையிலான ஆட்டத்தில் சூதாட்டம் நடந்திருக்கலாம் என்ற சந்தேகம் எழுந்துள்ளது. இந்த ஆட்டத்தில் சென்னை அணி 130 முதல் 140 ரன்கள் வரை எடுக்கும் என்று குருநாத் மெய்யப்பன் தனது கணிப்பை விண்டூ தாரா சிங்கிடம் (இந்தி நடிகர்) கூறியுள்ளார். அவர் சொன்னது போலவே ஏறக்குறைய நடந்துள்ளது. 

சென்னை அணி அந்த ஆட்டத்தில் 141 ரன்களே எடுத்தது. ஆனால் இதன் மூலம் வைத்து மட்டுமே குருநாத் மெய்யப்பன், ‘மேட்ச் பிக்சிங்’ செய்தார் என்று அர்த்தம் கிடையாது. ஏனெனில் மெய்யப்பனுக்கு அது தொடர்பான தகவல்கள் நிறைய தெரிந்து இருந்தது. அல்லது அவருக்கு அந்த அணியின் ரகசிய தகவல்கள், திட்டங்கள், ஆட்டத்தின் நிலைப்பாடுகள் அனைத்தையும் எளிதாக பெறும் நிலை இருந்தது. 

இது போன்ற தகவல்கள் மற்றவர்களுக்கு கிடைத்திருக்காது. சென்னை-ராஜஸ்தான் அணிகள் இடையிலான ஆட்டத்தை ‘பிக்சிங்’ செய்வதற்கு ஒரு ஒப்பந்தம் முன்னெடுக்கப்பட்டு வருகிறது என்று ஏப்ரல் 27-ந்தேதி நடந்த இரவு விருந்து ஒன்றில் அகர்வால் உத்தம் ஜெயினிடம் கூறியுள்ளார். பின்னர் அதே நாளில் குருநாத் மெய்யப்பன், சீனியர் வீரர் ஒருவர், தங்களது அணி 140 ரன்கள் மட்டுமே எடுப்பது என்ற திட்டத்திற்கு ஒப்புக்கொண்டுள்ளதாக தகவல் அனுப்பியுள்ளார். இந்த தகவல் ஜெய்ப்பூரில் இருந்த சஞ்சய் என்பவருக்கு, அகர்வாலின் மூலம் ஜெயின் முன்னிலையில் போன் மூலம் அளிக்கப்பட்டுள்ளது. 

புரோக்கர் உத்தம் ஜெயின் கூறிய விஷயங்கள் பற்றி தெரிந்த அனைத்து போலீஸ் அதிகாரிகளும் வேறு இடத்திற்கு மாற்றப்பட்டுள்ளனர். இதற்கிடையே இந்த வழக்கும் சென்னை சி.பி.சிஐ.டி. போலீசுக்கு மாற்றப்பட்டது. இது தொடர்பான விசாரணை அறிக்கையை கேட்ட போது யாரும் தாக்கல் செய்யவில்லை. இப்போதுள்ள சூழ்நிலையில் இது தொடர்பாக முழு அதிகாரம் கொண்ட தனிப்பட்ட விசாரணை முகமை மூலம் விசாரணை நடத்த உத்தர வேண்டும். இவ்வாறு அதில் கூறப்பட்டுள்ளது. இந்த ஆட்டத்தில் ராஜஸ்தான் அணி 5 விக்கெட் வித்தியாசத்தில் சென்னை சூப்பர் கிங்சை தோற்கடித்தது குறிப்பிடத்தக்கது. 

இதே போல் இந்திய கிரிக்கெட் வாரிய முன்னாள் தலைவர் ஐ.எஸ்.பிந்த்ரா, பிரபலமான இரண்டு இந்திய முன்னாள் வீரர்களுக்கு சூதாட்டத்தில் தொடர்பு உண்டு என்பதை நான் அறிவேன் என்று சொல்லியுள்ளார். சூதாட்டத்தில் சிக்கி தடை விதிக்கப்பட்ட ஸ்ரீசாந்த் டெல்லி போலீசாரிடம், மூன்று முன்னாள் வீரர்களுக்கு சூதாட்டத்தில் பங்கு உண்டு என்று வாக்குமூலம் அளித்துள்ளார். இந்த விஷயங்களும் கோர்ட்டில் தாக்கல் செய்த அறிக்கையில் இடம் பெற்றுள்ளதாக தெரிகிறது.

source maalaimalar

இந்திய ஒலிம்பிக் சங்கத்திற்கு சர்வதேச ஒலிம்பிக் சங்கம் விதித்த தடை நீக்கம்

இந்திய ஒலிம்பிக் சங்கத்துக்கான (ஐ.ஓ.ஏ.) கடந்த ஆண்டு நடந்த நிர்வாகிகள் தேர்தலில் சர்வதேச ஒலிம்பிக் கமிட்டியின் விதிமுறைகள் கடைப்பிடிக்கப்படவில்லை என்ற குற்றச்சாட்டு எழுந்தது. தேர்தலில் அரசின் குறுக்கீடு இருந்ததால் இந்திய ஒலிம்பிக் சங்கத்தை சஸ்பெண்ட் செய்ய சர்வதேச ஒலிம்பிக் கமிட்டி முடிவு செய்தது.

மேலும், காமன்வெல்த் போட்டி ஊழல் குற்றச்சாட்டில் சிக்கி சிறை சென்ற லலித் பனோட், பொதுச் செயலாளராக போட்டியின்றி தேர்வு செய்யப்பட்டதும் பெரும் சர்ச்சையை கிளப்பியது.

இதனால், 2012 டிசம்பர் 4-ம்தேதி இந்திய ஒலிம்பிக் சங்கத்தை சஸ்பெண்ட் செய்து ஐ.ஓ.சி. உத்தரவிட்டது. இதனால், தற்போது ரஷ்யாவில் தொடங்கிய குளிர்கால ஒலிம்பிக் போட்டியில் இந்தியா சர்வதேச ஒலிம்பிக் கொடியை ஏந்திச் செல்ல வேண்டிய நிலை ஏற்பட்டது.

இந்நிலையில் இந்திய ஒலிமபிக் சங்கத்திற்கு சர்வதேச ஒலிம்பிக் சங்கம் வித்த தடை இன்று நீக்கப்பட்டது. இதனால் இந்தியா சர்வதேச ஒலிம்பிக் கமிட்டி உறுப்பினர் பட்டியலில் இந்தியா சேர்ந்தது.

source maalaimalar

ஆசிய கிரிக்கெட் - 20 ஓவர் உலக கோப்பை: இந்திய அணி இன்று அறிவிப்பு

பெங்களூர், பிப்.11- 

ஆசிய கோப்பை கிரிக்கெட் (பிப்.25-மார்ச்.8) மற்றும் 20 ஓவர் உலக கோப்பை போட்டி (மார்ச்.16-ஏப்.6) வங்காளதேசத்தில் நடக்கிறது. இதற்கான இந்திய அணி பெங்களூரில் இன்று (செவ்வாய்க்கிழமை) தேர்வு செய்யப்படுகிறது. ஆசிய கோப்பைக்கான ஒரு நாள் போட்டி அணியில் சுரேஷ் ரெய்னா நீக்கப்பட வாய்ப்புள்ளது. 

கடந்த 24 ஒரு நாள் போட்டிகளில் ஒரே ஒரு அரைசதம் (அதுவும் ஜிம்பாப்வேக்கு எதிராக) மட்டுமே அடித்துள்ள அவரது இடத்திற்கு புஜாராவை கொண்டு வருவது குறித்து தேர்வு குழு பரிசீலிக்கும் என்று கூறப்படுகிறது. நியூசிலாந்து தொடரில் ஒரே ஒரு ஆட்டத்தில் மட்டுமே களம் இறங்கிய ஆல்-ரவுண்டர் ஸ்டூவர்ட் பின்னிக்கு பேட்டிங் செய்ய வாய்ப்பு கிடைக்கவில்லை. 

அவர், இரானி கோப்பை கிரிக்கெட்டில் நேற்று 82 பந்துகளில் செஞ்சுரி அடித்ததை, தேர்வாளர்களும் நேரில் கண்டு களித்தனர். இதனால் அவருக்கு இன்னொரு வாய்ப்பு கிடைக்கும் என்று உறுதியாக நம்பலாம். உள்ளூர் போட்டிகளில் ஜொலித்து வரும் கர்நாடக வேகப்பந்து வீச்சாளர் வினய்குமாரும் மீண்டும் அழைக்கப்படலாம். 

இரானி கோப்பை போட்டியில் சோபிக்க தவறிய கவுதம் கம்பீர், ஹர்பஜன்சிங் ஆகியோருக்கு இடம் கிடைப்பது சந்தேகம் தான். 20 ஓவர் போட்டி அணியில் யுவராஜ்சிங், சுரேஷ் ரெய்னா தொடருவதில் பிரச்சினை இருக்காது. மொத்தத்தில் அணியில் பல மாற்றங்கள் இருக்கலாம் என்று எதிர்பார்க்கப்படுகிறது. 

source maalaimalar

ஐ.பி.எல். ஏலத்தில் ஹேடின், மோர்கன் விலகல்

மெல்போர்ன், ஜன.11- 

ஐ.பி.எல். கிரிக்கெட் வீரர்களுக்கான ஏலப்பட்டியலில் இருந்து ஆஸ்திரேலிய விக்கெட் கீப்பர் பிராட் ஹேடின், இங்கிலாந்து பேட்ஸ்மேன் இயான் மோர்கன் ஆகியோர் விலகியுள்ளனர். 

ஹேடின், குடும்ப சூழ்நிலையை காரணம் காட்டியுள்ளார். கெவின் பீட்டர்சனின் கிரிக்கெட் வாழ்க்கை திடீரென முடிந்து விட்டதால், டெஸ்டில் அவரது இடத்தில் மோர்கன் சேர்க்கப்பட வாய்ப்புள்ளது. எனவே ஐ.பி.எல். தொடரை துறந்து விட்டு, டெஸ்ட் அணியில் இடம் பிடிப்பதற்கான முயற்சியில் இறங்கப் போவதாக அவர் கூறியிருக்கிறார். இதே போல் கணுக்கால் காயம் காரணமாக தென்ஆப்பிரிக்க வேகப்பந்து வீச்சாளர் கிறிஸ் மோரிசும் விலகியுள்ளார்.

source maalaimalar

ரித்தி நிறுவனத்தில் பங்குகள்: டோனிக்கு முட்கல் குழு மறைமுக கண்டனம்

புதுடெல்லி, பிப்.11–
ஐ.பி.எல். சூதாட்டம் குறித்து விசாரணை நடத்திய நீதிபதி முட்கல் குழு டோனிக்கு மறைமுகமாக கண்டனம் தெரிவித்து உள்ளது.
இந்திய அணியின் கேப்டனும், சென்னை சூப்பர் கிங்ஸ் கேப்டனுமான டோனி ரித்தி ஸ்போர்ட்ஸ் நிறுவனத்தில் பங்குதாரராக இருந்தார். இந்த நிறுவனத்தை அவரது நண்பர் நடத்தி வருகிறார்.
ரெய்னா, ஜடேஜா, ஓஜா ஆகிய வீரர்களும் அந்த நிறுவனத்தில் இருந்தனர்.
இதுதொடர்பாக எழுந்த சர்ச்சையால் டோனி தனது பங்குகளை அந்த நிறுவனத்திடம் ஒப்படைத்து விட்டதாக தெரிவிக்கப்பட்டது.
முட்கல் குழு விசாரணையில் இது தொடர்பாக டோனியை மறைமுகமாக சாடியுள்ளது. இந்திய அணிக்காக ஆடும் வீரர்கள் கண்டிப்பாக நிறுவனங்களில் பங்குகளை பெற்று இருக்கக் கூடாது என்று தெரிவித்து உள்ளது.
மேலும் ஐ.பி.எல். அணி உரிமையாளர்களுக்கு சொந்தமான கம்பெனிகளில் ஊழியராக இருப்பதை தவிர்க்க வேண்டும் என்று தெரிவித்து உள்ளது.
அந்த அறிக்கையில் யாருடைய பெயரையும் குறிப்பிடவில்லை. டோனி ஐ.பி.எல். அணியின் உரிமையாளருக்கு சொந்தமான கம்பெனியில் துணைத் தலைவராக இருக்கிறார்.
சூதாட்டத்தை தடுக்க வீரர்களுடன் அவர்களது ஏஜெண்டுகளை அனுமதிக்க கூடாது என்றும் அறிக்கையில் தெரிவிக்கப்பட்டுள்ளது.
அணி வீரர்களுடனும், அவர்கள் தங்கும் ஓட்டலிலும் வீரர்களின் ஏஜெண்டுகளை அனுமதிப்பது தவறு என்றும் கூறியுள்ளது.

source maalaimalar

ஐ.பி.எல். ஒப்பந்த விதிமுறை மீறல்: சென்னை சூப்பர் கிங்ஸ் அணி நீக்கப்படுமா?

புதுடெல்லி, பிப். 11–
ஐ.பி.எல். சூதாட்டம் குறித்து நீதிபதி முகுல் முட்கல் குழுவின் விசாரணை அறிக்கை தாக்கல் செய்யப்பட்டுள்ளது.
அதில் சென்னை சூப்பர் கிங்ஸ் அணியின் கவுரவ உறுப்பினர் குருநாத் மெய்யப்பன் பெட்டிங்கில் ஈடுபட்டது என்று தெரிவிக்கப்பட்டுள்ளது. அவர் அணியின் உள் விவரங்களை தெரிவித்து இருக்கிறார்.
இது குறித்து அந்த அறிக்கையில் கூறி இருப்பதாவது:–
குருநாத் மெய்யப்பன் அணியின் தகவல்களை கூறி சூதாட்டத்தில் ஈடுபட்டதாக குற்றம் சாட்டப்பட்டது. இது தொடர்பாக நடத்தப்பட்ட விசாரணையில் அவர் பெட்டிங்கில் ஈடுபட்டது நிரூபணமாகி உள்ளது. அவர் மேட்ச்பிக்சிங் செய்தாரா என்பது பற்றி மேலும் விசாரணை செய்ய வேண்டும்.
அவர் அணி நிர்வாகியாக செயல்பட்டார். அவரை கட்டுப்படுத்த சென்னை சூப்பர் கிங்ஸ் தவறி விட்டது. அவர் ஐ.பி.எல். விதிமுறைகளை மீறியுள்ளார்.
குருநாத் மெய்யப்பன் மீதோ அல்லது சென்னை சூப்பர் கிங்ஸ் அணி மீதோ என்ன நடவடிக்கை எடுப்பது என்பது பற்றி சுப்ரீம் கோர்ட்டுத்தான் முடிவு செய்ய வேண்டும்.
இவ்வாறு அதில் தெரிவிக்கப்பட்டுள்ளது.
குருநாத் மெய்யப்பன் பெட்டிங்கில் ஈடுபட்டது நிரூபணமானதால் சென்னை சூப்பர் கிங்ஸ் அணிக்கு சிக்கல் ஏற்பட்டுள்ளது. ஐ.பி.எல். அணி உரிமை யாளர்களுக்கான ஒப்பந்தத்தை சென்னை அணி மீறியது. இதனால் சென்னை அணியின் ஒப்பந்தம் ரத்தாகும் நிலை ஏற்பட்டுள்ளது. அந்த அணி ஐ.பி.எல்.லில் இருந்து நீக்கப்படலாம் என்று தெரிகிறது.

source maalaimalar
Subscribe to: Posts ( Atom )